امتى بحس برمضان

بحس بيه في صوت المسحراتي
بحس بيه في صوت الزينه لما الهوا يهزها
بحس بيه في نور الفانوس في الشارع
بحس بيه في زحمه التراويح
بحس بيه من ريحة القطايف خارجه من كل بيت
بحس بيه لما اشوف المصحف في كل ايد
بحس بيه في لمة العزايم
بحس بيه في طعم قمر الدين
بحس بيه في طبق الفول عالسحور
بحس بيه في ضربة المدفع
بحس بيه في لعب العيال بالصواريخ والبمب
وكل سنه و انتم طيبيين

بطاقة تعارف

انا واحد من الناس
يمكن اكون اخوك
يمكن اكون ابوك
يمكن اكون جارك
يمكن اكون صديق
جنبك على الطريق
يمكن اكون حبيب
ينورلك حياتك
انا واحد تعرفه
قابلته من سنين
شايلك كل حب
في قلبه الكبير
انا لوني لونك
ودمي دمك
وهمي همك
في الحزن جنبك
تمسح ايدي دمعك
في الفرح جنبك
وقلبي ليك هديه
بتشوفني كل يوم
في شارع او في حاره
في جامع او في دير
في مصنع او في غيط
بتسلم عليه
وامد لك ايديه
واخدك في حضني
انا واحد من الناس