رسالة معايده

كل سنه وانتم طيبين بمناسبة العيد رغم انها متأخره
طبعا في الأعياد الشعب المصري بيضرب الرقم القياسي في كثافة ارسال ال(اس ام اس) ذ
المهم
انا زي كل الناس بعت رساله لواحد قلتله عيد سعيد
صاحبنا مكدبش خبر ورد عليا برساله تانيه
خلتني ضحكت بعدين فكرت فيها لأتيها فيه حكمه
قلت اكتب لكم الرساله زي مجاتني بالظبط
والحدق يفهم
ادي الرساله
عيد مبارك ونظيف و شريف
وكله جمال و كمال وسرور
مع تحيات الحزب الوطني

ومضى شهر الصيام

قال صلى الله عليه و سلم خاب وخسر من ادرك رمضان ولم يغفر له

وها قد مضى الشهر الفضيل وخسر من خسر و ربح من ربح

اللهم اجعلنا من الرابحين

الواسطه

من يومين قريت قصيده لبيرم التونسي اسمها "الواسطه لسه شغاله"

القصيده بتقول ايه

الواسطه لسه شغاله يا رجـــــالــه
والحاله هياها الحاله في كل مكان

لفندي قال و الأسطى هيه الواسطه
في كل مركز و محطه خاتم سليمان

تشغلك وانت فراش كاتب بمعاش
وتدخلك سينما ببلاش ويا الأخوان
.
.
داء في الكنانه مـتمكن او مـتـوطـن
وجرح ضارب ومعفن زي السرطان

الله يرحمك يا بيرم

المهم اخر بيتين زي متقولوا علموا في دماغي طول النهار والليل مش سامع غيرهم وفي كل مكان شايفهم
فعلا داء متمكن زي السرطان سيطر على عقول الناس والدليل على كده الأمثال الشعبيه التي ضربت في الواسطه

والتي تدل على اقتناع الناس بالواسطه وتغلغلها في عقولهم

الي معندهوش واسطه......يركن عالباسطه
الي ليه ضهر....مينضربش على باطنه
يا بخت من كان المدير...خاله
لو نهر النيل صلصه......ميقديش الكوسه الي في البلد

وطبعا الكلام ده في كل حاجه في حياتنا لو معندكش واسطه تنداس بالجزم وحقك يضيع

طيب وايه الحل ...ايه العلاج

فكرت كتير ودورت اكتر بصراحه مش لاقي حل

حاجه تقرف

سلام